Mae AC Ynys Môn yn galw am fuddsoddiad er mwyn dileu digartrefedd ar ôl marwolaeth dyn lleol

05/02/2020Gan: Heledd Roberts

Mae Aelod Cynulliad Plaid Cymru Ynys Môn, Rhun ap Iorwerth wedi talu teyrnged heddiw, yng Nghynulliad Cenedlaethol Cymru i Paul Daniel Hughes, dyn digartref y daethpwyd o hyd i’w gorff yn Llangefni yn ddiweddar, ac anogodd Lywodraeth Cymru i fuddsoddi’n iawn i ddileu digartrefedd fel na all marwolaeth gyffelyb ddigwydd eto.

Roedd Mr Hughes yn byw mewn pabell ar lannau Afon Cefni am nifer o fisoedd cyn ei farwolaeth, ar ôl cael ei gicio allan o hostel am ddwyn brechdan un o’i gydletywyr.

Roedd wedi cyfaddef ei ddwyn cyn hynny, yn syml fel y gallai fynd i’r carchar a chael to uwch ei ben, ar ôl cael ei wneud yn ddigartref yn dilyn marwolaeth ei fam.

Talodd AC Plaid Cymru Mr ap Iorwerth deyrnged i Mr Hughes, gan ddweud:

“Rwy’n wirioneddol drist o glywed am farwolaeth Paul Daniel Hughes, dyn digartref a oedd yn teimlo fel nad oedd ganddo unman i droi oherwydd y sefyllfa yr oedd ynddi, gydag ychydig iawn o gefnogaeth ar gael iddo i’w godi allan o’r amgylchiadau anodd yr oedd wedi darganfond ei hun ynddo fo.

“Ceisiodd fy nhîm helpu Paul ond methodd nifer o atgyfeiriadau at sefydliadau ac awdurdodau lleol ac ymyriadau ddwyn ffrwyth oherwydd y gwasanaethau cyhoeddus llethol yr ydym yn cael ein gorfodi i weithio gyda nhw y dyddiau yma.

“Mae marwolaeth Paul yn ein hatgoffa y gall unrhyw un ohonom a phob un ohonom syrthio ar amseroedd caled, a phan fydd pobl yn wynebu anawsterau o’r fath rhaid iddynt gael yr holl gefnogaeth sydd ei hangen arnynt i’w helpu i wella.

“Roedd Paul yn ddyn a oedd wir eisiau cyfle arall. Mae delio â chymdeithas a system gymorth sydd wedi goddef toriadau i adnoddau a chyllid a oedd i fod helpu gyda sefyllfaoedd fel hyn yn golygu bod y system wedi ei fethu’n llwyr.

“Oherwydd pobl fel Paul y mae’n rhaid i ni fuddsoddi’n iawn i ddileu digartrefedd, ac mae’n rhaid cynnyddu’r cyllid sydd ar gael.”