Mae Aelod Cynulliad Plaid Cymru Ynys Mon Rhun ap Iorwerth wedi llongyfarch Ifan Wyn Erfyl Jones am iddo gael ei ddewis o blith saith ymgeisydd i fod yn gynrychiolydd yr Ynys yn Senedd Ieuenctid cyntaf Cymru.
Gyda’r Llywydd Elin Jones AC yn cadarnhau canlyniadau Etholiadau Senedd Ieuenctid cyntaf Cymru cyn y Cyfarfod Llawn yn y Cynulliad y prynhawn yma, cadarnhawyd Ifan Wyn Erfyl Jones fel cynrychiolydd cyntaf Ynys Môn yn Senedd Ieuenctid Cymru.
Bu i Mr ap Iorwerth gadeirio sesiwn hustings ar gyfer saith ymgeisydd Senedd Ieuenctid Cymru Ynys Mon ym Mharc Gwyddoniaeth Menai yn Gaerwen ym mis Tachwedd a roedd o wedi mwynhau cyfarfod pob un ohonynt.
Wrth gynnig ein llongyfarchiadau i Ifan, dywedodd Mr ap Iorwerth:
“Llongyfarchiadau mawr i Ifan Wyn Erfyl Jones ar gael ei ethol i fod yn gynrychiolydd Ynys Môn yn Senedd Ieuenctid cyntaf Cymru, mae hwn yn amser hynod gyffrous i wleidyddiaeth yng Nghymru ac rwy’n siŵr y bydd Ifan yn llais cryf i gymunedau ifanc angerddol Ynys Môn.
“Mi wnes i gynnal a chadeirio hustings i ymgeiswyr Senedd Ieuenctid Ynys Môn ym mis Tachwedd, a dywedais wrthynt i gyd, eu bod nhw bob un yn ddewr iawn i fod yn sefyll etholiad, a rydw i’n gobeithio y bydd pob un wedi mwynhau’r profiad.
“Yn sicr, fe wnes i fwynhau cyfarfod â’r ymgeiswyr, ac o’m trafodaethau gydag Ifan yn yr hustings, rwy’n siŵr y bydd yn gynrychiolydd cryf ar Ynys Môn.
“Mae’r holl ymgeiswyr yn enillwyr yng ngolwg Ynys Môn gan fod eu huchelgais a’u brwdfrydedd i gynrychioli eu cyd-bobl ifanc yn ganmoladwy a dylid eu cymeradwyo am hynny. Edrychaf ymlaen at weithio gydag Ifan yn y dyfodol a dymunaf yn dda iddo wrth gynrychioli pobl ifanc arbennig yr ynys.”